மாக்கோலம் பூக்கோலம்...

வாசலிலே நீர்தெளிக்க

வளையோசை ஊர்எழுப்ப

வானவில்ல நீ வளச்சு

வண்ணக்கோலம் ஒன்னு போட

வச்சகண்ணு வாங்காம

வானமே உன்வாசல்வர

வசியம் போட்டு வரஞ்சுவச்ச

வரிசைக்கோலம் நெனவிருக்கா!!?

***

நீ கோலம்போட புள்ளி வைச்சு

புத்தகம் பார்த்திருக்க  ராவோடு ராவாய்

நட்சத்திரங்களை - தரைக்கு

தடம் பெயர்த்து வந்தவளே

 என்று ரகசியமா சொல்லிவச்ச

ராப்பொழுது நெனவிருக்கா!!?.

***


பிறைநிலாவ பிச்சுவந்து

கிள்ளி கிள்ளி அத எடுத்து

வாசலிலே நீர்தெளிச்சு

நீ போட்ட வாழ்த்துகோலம் 

நெனவிருக்கா!!??
***

வீட்டு  முற்றத்தில்  குத்தவைத்து

உட்கார்திருந்த உன்னை;

கோலம் என்றெண்ணி முதல் பரிசை

உன் வீட்டுக்கு அறிவித்த

கோலப்போட்டி நெனவிருக்கா!!?.

***

மருதாணி அரைச்சு 

மல்லிகை  கையில்  கோலம் போட்டு

அழகா இருக்கானு அடுத்தநாளு கேக்கையில 

இருட்டுல  இலுவிவிட்ட இந்த கோலம் அழகுன்னு

கண்ணாடி காட்டி கண்ணடிச்சது நெனவிருக்கா!!?.

***

ஆத்தா கிட்ட அடிவாங்கி

'யப்பே...'ன்னு அழுகையில

கண்ணத்த கடந்துவந்து

கண்ணீர் போட்ட நீர் கோலம்

கடவாயில்  உப்பு கரிச்சது

கண்ணே  நெனவிருக்கா!!?.

***

கைவிரல் நடனமாட 

கைவளவி தாளம்போட

கலர்கலரா மாவெடுத்து 

கச்சிதமா கோலம்போட்டு  

கண்மூடி கனாகண்ட

காதலான எழுப்பிவிட்டு 

கதவோரம்  வந்துநின்னு  

கண்ணாடிக்க,

கொலுச பேசவிட்டு

கோபப்பட்ட நெனவிருக்கா!!?.

***

கார்த்திகை மாசத்து

தீபத்துல   திரியவச்சு

தெருவெல்லாம்

தினறவச்சு நீ போட்ட

தீக்கோலம் நெனவிருக்கா!!?.
***

 எட்டு புள்ளி கோலம் போட்டு

எட்டுவச்சு  நீபோக - உன் 

தலையயேரிய   மல்லிகைபூ

எரங்கிவந்து கோலம்பாக்க

மாக்கோலம் பூக்கோலமா

மாறிப்போனது நெனவிருக்கா!!?.

***

வண்டியுருக்கு வாக்கப்பட்டு வண்டியிலே  நீபோக

வகைவகையா கோலம்பார்த்த என் வீட்டு வாசப்படி

வாழவெட்டியா வழியத்து கெடக்குமுன்னு

வஞ்சியே  நெனவிருக்கா!!?.

***